Um átakið

Bleika slaufan er árlegt átaksverkefni Krabbameins­félagsins tileinkað baráttunni gegn krabbameinum hjá konum. 

 

verum til fyrir konurnar í lífi okkar

Í ár er leggjum við áherslu á að vera til og mikilvægi þess að vera til staðar fyrir þær konur sem greinast með krabbamein, þegar tilveran breytist snögglega og við tekur tími sem getur reynst afar erfiður. Verum tilbúin þegar á reynir. Við hjá Krabbameinsfélaginu erum tilbúin og erum til staðar þegar á þarf að halda, hvort sem þú hefur fengið krabbamein eða ert aðstandandi. Varst að greinast, ert í meðferð eða hefur lokið meðferð. Faglegur og félagslegur stuðningur sem Krabbameinsfélagið veitir er án endurgjalds. 

Dánartíðni kvenna af völdum krabbameina hefur lækkað um 35% á síðustu 50 árum og lífslíkur kvenna hafa nær tvöfaldast. 

Krabbameinsfélagið vill auka árangurinn enn frekar með öflugu vísindastarfi, fræðslu og forvörnum, ráðgjöf og stuðningi. Með kaupum á Bleiku slaufunni eða öðrum stuðningi við átakið átt þú þátt í að fækka þeim sem fá krabbamein, fjölga þeim sem lifa af og bæta lífsgæði þeirra.  Okkur finnst óásættanlegt að þriðja hver kona á Íslandi fái krabbamein á lífsleiðinni og 300 konur deyi árlega úr krabbameinum.

Takk fyrir stuðninginn. Þitt framlag skiptir öllu máli. 

Allur ágóði Bleiku slaufunnar 2021 rennur til fjölbreyttar starfsemi Krabbameinsfélagins svo hægt sé að vera til staðar fyrir þá sem greinast með krabbamein og aðstendur, til að stunda öfluga fræðslu og forvarnir auk fjölbreytts rannsóknarstarfs.

Hvers vegna?

Einn af hverjum þremur Íslendingum má búast við að greinast með krabbamein á lífsleiðinni. Sífellt betur tekst að greina krabbamein tímanlega, ráða niðurlögum þeirra og halda sjúkdómunum í skefjum. Nú er svo komið að um 72% þeirra sem greinast með krabbamein eru á lífi fimm árum síðar. Í dag eru rúmlega 15.000 þúsund einstaklingar á lífi sem greinst hafa með krabbamein og þeim fer hratt fjölgandi. Þessi jákvæða þróun hefur í för með sér ört vaxandi þörf fyrir þjónustu og stuðning við þá sem hafa greinst og aðstandendur þeirra, bæði meðan á veikindum stendur og þegar þau eru yfirstaðin.

Fjárhagslegur stuðningur almennings og fyrirtækja er grundvöllur þess að Krabbameinsfélagið geti starfað. 

Í sameiningu getum við haldið náð enn betri árangri í að draga úr fjölda krabbameinstilvika, fækka dauðsföllum af völdum krabbameina og bæta lífsgæði þeirra sem greinast með krabbamein og aðstandenda þeirra. Framlag þitt er forsenda þess að árangur náist.

Vissir þú að...?

  • Með öflugri fræðslu og forvörnum vinnur Krabbameinsfélagið að því markmiði að koma í veg fyrir 4 af hverjum 10 krabbameinum?
  • Vísindasjóður Krabbameinsfélagsins hefur á fimm árum úthlutað alls 327 milljónum króna til íslenskra rannsókna á orsökum, forvörnum, meðferð og lífsgæðum?
  • Fjöldi þeirra sem nýttu sér símaráðgjöf Krabbameinsfélagsins jókst um 37% á milli ára 2018-2019?
  • Að ráðgjafar okkar veittu ráðgjöf, stuðning og upplýsingar í 6.392 skipti árlega að meðaltali (2018-2020)?
  • Krabbameinsfélagið á átta íbúðir fyrir fólk af landsbyggðinni sem þarf að sækja læknisþjónustu til Reykjavíkur? 
  • Krabbameinsfélagið styrkir framfaraverkefni eins og þróun rafrænnar samskiptalausnar fyrir sjúklinga í krabbameinsmeðferð á Landspítala?
  • Svæðafélög og stuðningshópar Krabbameinsfélagsins eru yfir 30 talsins?
  • Viðtöl við hjúkrunarfræðinga og sálfræðing hjá Krabbameinsfélaginu eru án endurgjalds fyrir þá sem greinst hafa með krabbamein og aðstandendur þeirra? 
  • Að Krabbameinsfélagið heldur um 300 hádegisfundi eða námskeið árlega?
  • Krabbameinsfélagið býður vinnustöðum upp á fræðslufyrirlestra þeim að kostnaðarlausu? 
  • 44 þúsund notendur heimsækja fræðsluvefi Krabbameinsfélagsins að meðaltali á mánuði?  www.krabb.is - www.karlaklefinn.is - www.mottumars.is - www. bleikaslaufan.is

Hlín Reykdal er hönnuður slaufunnar 2021

Bleika slaufan 2021 er hönnuð af Hlín Reykdal, skartgripa­hönnuði. Hlín hefur hannað skartgripi undir eigin nafni frá árinu 2010. Hún leggur mikið upp úr fallegum litasamsetningum og vönduðu handverki í hönnun sinni. Allir hennar gripir eru framleiddir hér á landi. Hlín er einn eigandi hönnunarversluninnar Kiosk Grandagarði 35.

Bleika slaufan 2021 verður seld 1.-15. október 2021 þegar sala hefst í vefverslun Krabbameinsfélagsins og hjá söluaðilum um land allt.

Bleika slaufan í yfir 20 ár

Fyrsta árvekniátakið undir nafni Bleiku slaufunnar hér á landi var í október 2000. Þá var það á vegum Krabbameinsfélagsins í samvinnu við Samhjálp kvenna en að frumkvæði heildverslunarinnar Artica, umboðsaðila Estée Lauder. Tæpum áratug áður hafði þetta bandaríska snyrtivörufyrirtæki farið að notað bleika slaufu sem tákn í baráttunni gegn brjóstakrabbameini. Fyrstu árin var bleikri tauslaufu dreift og tekið við framlögum til stuðnings baráttunni.

Síðan 2007 hafa verið seldar sérhannaðar slaufur til styrktar átakinu.

Bleika slaufan er alþjóðlegt tákn brjóstakrabbameins en frá árinu 2010 hefur athyglin beinst að öllum krabbameinum hjá konum hér á landi. Farið var að lýsa mannvirki í bleikum lit hér á landi í október 2001. Fjöldi fyrirtækja, félagasamtaka og einstaklinga hafa tekið þátt í árvekniátaki Bleiku slaufunnar og sýnt þannig stuðning við baráttuna gegn krabbameinum hjá konum. Sá stuðningur verður aldrei metinn til fjár og er ómetanlegur fyrir félagið og alla þá sem takast á við krabbamein í sínu lífi.