Skimun fyrir leghálskrabbameini

Í skimun er tekið frumusýni frá leghálsi með það að markmiði að finna eins fljótt og hægt er þær konur sem hafa frumubreytingar eða krabbamein á snemmstigi. Því fyrr sem hægt er að bregðast við og fjarlægja þess háttar frumubreytingar því betra.

Hverjum er boðið í skimun?

Konum á aldrinum 23-65 ára stendur til boða skimun fyrir leghálskrabbameini þriðja hvert ár.

Hvað er skimun?

Í skimun er tekið frumusýni frá leghálsi með það að markmiði að finna eins fljótt og hægt er þær konur sem hafa frumubreytingar (sem eru forstig leghálskrabbameins) eða krabbamein á snemmstigi. Því fyrr sem hægt er að bregðast við og fjarlægja þess háttar frumubreytingar því betra. Þannig er hægt að koma í veg fyrir að krabbamein nái að myndast.

Ávinningur og áhætta skimunar

Leghálskrabbamein er eitt fárra krabbameina sem hægt er að greina á forstigi og lækna. Frá því að skimun fyrir leghálskrabbameini hófst hér á landi fyrir hálfri öld hefur dánartíðni úr sjúkdómnum lækkað um 90%.

Það er konum í sjálfvald sett hvort þær þiggi boð í skimun. Gott er að kynna sér upplýsingar um ávinning og áhættu.

Hvar er hægt að fara í skimun?

Skipulögð hópleit að leghálskrabbameini fer fram á Leitarstöðinni í húsnæði Krabbameinsfélagsins að Skógarhlíð 8, 2. hæð. Konur eru einnig velkomnar í leghálskrabbameinsleit á flestar heilsugæslustöðvar og til sjálfstætt starfandi kvensjúkdómalækna.

Hægt er að senda fyrirspurnir á netfangið leit@krabb.is eða hringja í síma 540 1919 á milli kl. 8:00 og 15:30 alla virka daga.

Frekari upplýsingar

Hér má sjá vefsíðu Leitarstöðvarinnar og nánari upplýsingar um leghálskrabbameinsleit.
Hér má sjá algengar spurningar um leghálskrabbameinsleit og svör við þeim.
Einnig er vert að skoða myndböndin Hver er þín afsökun? sem svarar ýmsum spurningum um leghálsskoðun og Í leghálsskoðun með GoPro þar sem Saga Garðarsdóttir bregður sér í leghálsskoðun hjá Leitarstöð Krabbameinsfélagsins til að sýna hversu einfalt og fljótlegt það er að fara í leghálsskoðun.