Þekktu einkennin
Mikilvægt er að veita athygli þeim merkjum sem líkaminn kann að gefa um að heilsunni sé hætta búin. Viss einkenni vekja grun um krabbamein þó að vissulega geti þau einnig verið til marks um meinlausari kvilla.
Vertu meðvituð - Því fyrr sem krabbamein greinist, því líklegra er að meðferð beri árangur
Einkenni sem þú ættir ekki að láta fram hjá þér fara:
- Breytingar á brjóstum (hnútur, sár, útferð, bólga, roði og/eða þykknun húðar)
- Þykkildi eða hnútar, t.d í nára, handarkrika eða á hálsi, vörum eða tungu.
- Óreglulegar blæðingar og blæðingar eftir tíðahvörf
- Óvenjuleg blæðing, t.d. frá endaþarmi eða geirvörtu, blóð í hráka eða þvagi.
- Langvarandi óþægindi frá meltingarvegi, t.d. magaverkir eða uppþemba.
- Óútskýrt þyngdartap
- Breytingar á hægðum, t.d. langvarandi niðurgangur eða hægðatregða eða blóð í hægðum.
- Sár sem ekki grær, t.d. í munni eða á kynfærum.
- Þrálátur hósti eða hæsi
- Viðvarandi verkir án þess að orsök sé ljós
- Þreyta sem minnkar ekki við hvíld
- Nýir fæðingarblettir eða breytingar á blettum, t.d. stærð, lögun eða litur.
Einkennin hér að ofan geta vakið grun um krabbamein en geta einnig verið til marks um aðra sjúkdóma. Næstum öll einkenni sem krabbamein geta haft í för með sér geta einnig verið til marks um ýmislegt annað. Mikilvægt er þó að fá úr því skorið hjá lækni. Hér má finna frekari lýsingu á helstu einkennum krabbameina.
Hringdu í síma 800 4040 eða sendu okkur línu á radgjof@krabb.is ef þú vilt fá ráðgjöf hjúkrunarfræðings vegna einkenna.