Önnur krabbamein hjá konum

Krabbamein í kvenlíffærum (fyrir utan brjóst- og leghálskrabbamein)

Legbolskrabbamein

Legbolskrabbamein er fimmta algengasta krabbameinið hjá íslenskum konum og greinast um 37 konur árlega. Horfur eru almennt séð góðar því sjúkdómurinn uppgötvast oft snemma í sjúkdómsferlinu, í kjölfar óreglulegra tíðablæðinga eða blæðinga eftir tíðahvörf. Orsakir legbolskrabbameins eru nokkuð vel þekktar og koma áhrif kvenhormóna mikið við sögu. 

• Hér má lesa um helstu einkenni, orsakir, greiningu, meðferð, algengi og lífshorfur legbolskrabbameins.
  

Eggjastokkakrabbamein

Árlega greinast um 14 konur á Íslandi með krabbamein í eggjastokkum. Orsakir sjúkdómsins eru í langflestum tilfellum óþekktar en þættir sem draga úr tíðni egglosa, svo sem meðganga eða notkun getnaðarvarnarpillu, minnka líkur á eggjastokkakrabbameini. Í sumum tilfellum finnst samband milli krabbameins í eggjastokkum og brjóstum og er það talið tengjast erfðaþáttum. Sjúkdómseinkenni eru mjög óljós og ekki auðþekkt. Oft er um að ræða óþægindi og/eða verki frá kviðarholi.

• Hér má lesa um helstu einkenni, orsakir, greiningu, meðferð, algengi og lífshorfur eggjastokkakrabbameins.

Krabbamein í leggöngum og ytri kynfærum kvenna

Árlega greinast um átta konur á Íslandi með krabbamein í leggöngum og ytri kynfærum kvenna. Talið er að HPV-veirur eigi þátt í myndun flestra þessara meina. Helstu einkenni eru óþægindi (svo sem kláði, sviði, roði, blæðingar, hnúður eða sár sem grær illa) í ytri kynfærum, blóðug útferð frá leggöngum eða sársauki, t.d. í sambandi við þvaglát.

• Hér má lesa um helstu einkenni, orsakir, greiningu, meðferð, algengi og lífshorfur krabbameina í leggöngum og ytri kynfærum kvenna.
  

Tíu algengustu krabbamein kvenna á Íslandi

Tíu algengustu krabbamein kvenna á Íslandi árin 2014-2018 voru:

• Brjóstakrabbamein (að meðaltali 220 konur á ári)
  
• Lungnakrabbamein (að meðaltali 92 konur á ári)
  
• Ristilkrabbamein (að meðaltali 68 konur á ári)
• Legbolskrabbamein (að meðaltali 38 konur á ári)
  
• Krabbamein í heila og miðtaugakerfi (að meðaltali 37 konur á ári)
  
• Sortuæxli í húð (25 að meðaltali árlega) og önnur húðkrabbamein (62 að meðaltali árlega) 
  
• Eitilfrumuæxli (að meðaltali 26 konur á ári)
  
• Eggjastokkakrabbamein (að meðaltali  23 konur á ári)
  
• Briskrabbamein (að meðaltali 19 konur á ári)
  

Frekari upplýsingar um hvert krabbamein fyrir sig má finna á krabb.is.

Hitt og þetta um krabbamein - Hvað veistu? Taktu prófið!